Թանգարանի պատմությունը

          Հրազդանի  տարածաշրջանի  պատմության, այստեղ  հաստատված տեղաբնիկների  պատմագիտական  զարգացման, նրանց  վարած  կենցաղի, նյութական  մշակույթի հուշարձանների, պատմա-աշխարհագրական  պայմանների մասին  ամբողջական  պատկերացում  է  տալիս  Հրազդանի երկրագիտական  թանգարանը, որը  հիմնադրվել  է  1980 թվականին, սկզբնական  շրջանում  գործելով   Հրազդան  քաղաքի բնակելի  շենքերից  մեկի  առաջին  հարկում:

           1980 ական  թթ.  սկզբներին սկսվում  են  Հրազդանի  շրջանի նախկին  վարչական  շենքի  հիմնանորոգման  աշխատանքները, որտեղ  էլ  շենքի  մի  մասը  նախատեսվում  է տրամադրել  Հրազդանի  երկրագիտական  թանգարանին: Շենքի  հիմնանորոգումն  ավարտվելուց  հետո  այստեղ  են տեղափոխվում  թանգարանային ցուցանմուշները  և  սկսվում  են  թանգարանի  նոր  մշտական  ցուցադրության  ձևավորման  աշխատանքները, որոնք  ավարտվում  են  1989թ.  վերջերին: Մշտական նոր  ցուցադրության  պաշտոնական  բացման  արարողությունը  նոր  շենքում  տեղի է ունեցել  1989թ. դեկտեմբերի  1-ին`  Հրազդանի  քաղխորհրդի  և  շրջխորհրդի, Հայաստանի  պատմության  պետական  թանգարանի  տնօրինության  և  աշխատակիցների, ինչպես  նաև ՀՀ մշակույթի  նախարարության  ներկայացուցիչների  մասնակցությամբ: Թանգարանը  նորից սկսել  է  գործել  որպես  Հայաստանի պատմության  պետական  թանգարանի  մասնաճյուղ` Հրազդանի  պատմա-երկրագիտական  թանգարան: 1993թ.-ից  թանգարանն  սկսել  է  գործել  որպես  ՀՀ  մշակույթի  նախարարության "Հրազդանի  երկրագիտական  թանգարան", իսկ  2002թ.-ից` "Հրազդանի  երկրագիտական  թանգարան" ՊՈԱԿ:

          Թանգարանի  շենքը  երկհարկանի  է,  ունի  նաև  նկուղային  հարկ: Մշտական  ցուցադրությունը գործում  է  առաջին  և  երկրորդ հարկերում, որը  բաղկացած  է հնագիտական, միջնադարյան, ազգագրական  և  նոր  ու  նորագույն  ժամանակաշրջաններին  վերաբերող  ցուցասրահներից: Նկուղային  հարկում  գտնվում  են  ֆոնդապահոցները, արտակարգ  իրավիճակների պայմանների  համար  նախատեսված  թաքստոց-ապաստարանը  և  սանհանգույցը:

          Թանգարանի  հիմնական  ֆոնդի  ցուցանմուշների  քանակը  2000-ից  ավելի  են, որոնք  ներկայացնում  են  Հրազդանի  տարածաշրջանը  հնագույն  ժամանակներից  մինչև  մեր  օրերը  ընդգրկող  նյութական  և  հոգևոր  մշակույթը:Թանգարանն  ունի  նաև  գիտաօժանդակ  ֆոնդ  /մոտ  1000  ցուցանմո /: Թանգարանի  ստեղծման  գործում   իրենց  ավանդն  են  ունեցել  անհատական  հավաքածուներ  ունեցող, Հրազդանի  տարածաշրջանի  բնակիչներ Մ. Պողոսյանը, Է. Ասատրյանը, Մ.Դավթյանը   և  Ց.Օհանյանը, որոնց  հավաքածուներից  ստացված  նվիրատվությունները  սկիզբ  են  հանդիսացել  թանգարանի  ստեղծման  համար:

          Թանգարանը  ունի  գիտխորհուրդ  և  գնահատման  ու  գնման  հանձնաժողով, որի կազմում,  բացի թանգարանի  աշխատակիցներից  ընդգրկվել  են  նաև  տարածաշրջանի  մշակույթի  և  կրթության  ոլորտի  աշխատողներ:

           Թանգարան  են  այցելում  բոլոր  տարիքի, զբաղմունքի  և  նախասիրությունների  տեր  մարդիկ: Թանգարանը  մշտական  կապի  մեջ  է  թանգարանով  հետաքրքրվող, անհատական  հավաքածուներ  ունեցող անձանց  հետ: Դպրոցականների  համար  կազմակերպվում  են  թեմատիկ  դաս-էքսկուրսիաներ, իսկ  ամռան  ամիսներին  հյուրընկալվում  են  նաև  Ծաղկաձորի  և  Մարմարիկի  հովտի  հանգստի ճամբարների  դպրոցականներն  ու  ուսանողները, ինչպես  նաև հանգստյան  տների  և  առողջարանների  քաղաքացիները: Թանգարանի  առօրյան  և  թանգարանում  կազմակերպվող  ժամանակավոր ցուցադրություններն  ու  միջոցառումները  լուսաբանվում  են  զանգվածային լրատվական  միջոցներով  /հանրապետական, մարզային, "Հրազդան"  հեռուստաստուդիա  և  այլն/: